తమ దుకాణాలకు పేరు రాయించడానికి గతంలో వ్యాపారులు పెయింటింగ్‌ కళాకారుల దగ్గరకు వెళ్లేవారు. వారం ముందుగానే అడ్వాన్సు రూపంలో డబ్బులు ఇచ్చి సిద్ధం చేసుకునేవారు. ఎన్నికలు వస్తున్నాయంటే రాజకీయ నాయకులు కూడా పెయింటర్లను గోడరాతలు రాయడానికీ ముందుగానే డబ్బులు ఇచ్చి వారికి పని ఇచ్చేవారు. కాని మారిన సాంకేతికతకు అనుగుణంగా మార్కెట్లో తక్కువ సమయంలో కావాల్సిన బొమ్మలు, ఫొటోలు, రంగు రంగుల పేర్లతో ప్రింటింగ్‌ తీసే ఫ్లెక్సీ యంత్రాలు వచ్చాయి. పట్టణాల్లో పలు చోట్ల దుకాణాలు వెలిశాయి. ప్రజలు కూడా వాటి వెంట పరుగులు తీశారు. దీంతో కాలక్రమేణా పెయింటింగ్‌ చేసే వారికి ఉపాధి కరువైంది. కానీ ఇటీవల జరుగుతున్న పరిణామాలు ఫ్లెక్సీని నిషేధిస్తారనే ప్రచారం జరగగా, అది నిజమైతే కళాకారులకు ప్రాణం పోసినట్లవుతుంది. పట్టణాలతోపాటు పలు మండల కేంద్రాల్లో విచ్ఛలవిడిగా ఫ్లెక్సీి దుకాణాలు ఏర్పాటయ్యాయి. దీంతో వాతావరణం కలుషితమవడంతోపాటు మనుషుల ఆరోగ్యంపై ప్రభావం పడుతుతోందని మంత్రులు, అధికారులు ప్రకటనలు చేశారు. విచ్ఛలవిడిగా ఫ్లెకీలను ఏర్పాటు చేయడాన్ని నిషేధించాలని కూడా సూచించారు. ఈ ప్రకటన అధికారికంగా రూపుదాలిస్తే పెయింటింగ్‌ కళాకారులకు ప్రాణం పోసినట్లవుతుంది. కొన్ని సంవత్సరాలుగా పెయింటింగ్‌ దుకాణాలు మూతబడి ఉపాధి కోల్పోవడంతో చాలా మంది చిత్రకారులు, కళాకారులకు పనిలేకుండా పోయింది. గతంలో పెయింటర్లకు చేతినిండా పని ఉండడంతో తీరికలేకుం డా గడిపేవారు. ఎన్నికల్లో గోడరాతల కోసం, బ్యానర్లు (దుస్తులపై) రాయడం కోసం చాలా మంది పెయింటింగ్‌ దుకాణాల వద్ద పడిగాపులు కాసేవారు. పెద్ద పెద్ద వ్యాపార సంస్థలు సైతం నగరాలు , పట్టణాలలో ఏర్పాటు చేసిన భారీ హోర్డింగులను పెయింటర్లతో రాయించేవారు. దాంతో కళాకారులకు ఎలాంటి లోటులేకుండా జీవనం సాగేది. ఆధునిక టెక్నాలజీలో భాగంగా వచ్చిన ఫెక్సీ యంత్రాల ప్రింటింగ్‌తో పెయింటర్లకు పని లేకుండాపోయింది. దీని వల్ల వారి జీవనం చిన్నాభిన్నంమైంది. రాను రానూ ఫెక్సీిలు అతి తక్కువ ధరకు వస్తుండడంతో నాయకులు కనిపించిన ప్రతిచోట ఫెక్సీలను ఏర్పాటు చేయడం మొదలు పెట్టారు. చివరికీ గల్లీలో కూడా విద్యుత్‌ స్తంభాలకు ఫ్లెక్సీిలను ఏర్పాటు చేశారు. ఎమ్మెల్యేలు, మంత్రుల పుట్టిన రోజున, పర్యటనలో భాగంగా స్వాగతం తెలపడానికీ భారీ ఫ్లెక్సీ బోర్డులు ఏర్పాటు చేసేవారు. దీంతో ఎక్కడా ఖాళీ స్థలం కనిపించేది కాదు.
విచ్ఛలవిడిగా వెలిసిన ఫెక్సీి ప్రింటింగులు...
తక్కువ ధరకే రంగు రంగుల బొమ్మలతో ప్రింటింగ్‌ , తక్కువ సమయంలో రావడంతో జనం వీటివైపే మొగ్గు చూపారు. దాంతో తక్కువ సమయంలోనే జిల్లా వ్యాప్తంగా పదుల సంఖ్యలో ఫ్లెక్సీ ప్రింటింగ్‌ యంత్రాలు వెలిశాయి. జిల్లా కేంద్రంతో ఉట్నూర్‌, తదితర మండాల్లో ఫ్లెక్సీ తయారీ యూనిట్లు ఏర్పడ్డాయి. ఒక్క జిల్లా కేంద్రంలోనే సుమారు ఐదు దుకాణాలు ఉన్నాయి.
రసాయనాలతో హానికరం.
హానికరమైన రసాయనాలతో తయారవుతున్న ఫెక్సీిలు మానవాళికి పూర్తిగా హానికరమని నిపుణులు చెబుతున్నారు. గతంలో దుకాణాల బోర్డులే మాత్రమే ఏర్పాటు చేసుకునే సంస్కృతి రాను రాను విచ్ఛల విడిగా మారింది. ఫ్లెక్సీి 250 మైక్రాన్‌ల మందం ఉండడంతో ఇది భూమిలో కరిగిపోవడం కష్టం. దీంతో పాటు ఫ్లెక్సీ ప్రింటింగ్‌కు ఉపయోగించే రసాయన రంగుల వల్ల పర్యావరణ హాని కలుగుతుందని భావించిన ప్రభుత్వం ఫ్లెక్సీల నిషేధానికీ సిద్ధమవుతోంది. పర్యావరణానికీ పెను ముప్పుగా పరిణమించిన పాలిథిన్‌ కవర్ల పై ప్రభుత్వం ఈపాటికే ఆంక్షలు విధించింది. ఇదే విధంగా ఫ్లెక్సీల ఏర్పాటును నిషేధించాలని ప్రభుత్వం యోచిస్తోంది. ప్రభుత్వం పాలిథిన్‌ కవర్లను నిషేధించినా అవి ఇప్పటికీ ఎక్కడ పడితే అక్కడ దర్శనమిస్తున్నాయి. 40 మైక్రాన్‌ల కంటే ఎక్కువగా ఉన్న కవర్లను ఉపయోగించాలని కోరినా ఎవరూ పట్టించుకోవడం లేదు. ఈ తరుణంలో ప్రభుత్వం ప్లెక్సీల నిషేధానికి ఏ విధమైన చర్యలు తీసుకుంటుందో వేచిచూడాల్సిందే.
Comments
Post a Comment